نقلة جديدة في وعي المؤثرين

سعيدة جدًا لما أشاهده من تطور جديد في وعي بعض المؤثرين 

وعيهم بدأ يؤتي ثمار أطيب وأنضج بعد سنوات تعب وشغل تحديدًا على محاور النفس والروح 

ظهرت عليهم القوة الحقيقية والثقة بما لديهم من مكتشافات وإجابات وجدوها وجمعوها أثناء رحلتهم ليقدموها للناس عن ثقة وتجربة. واللي عايز، هو حر. واللي مش عايز، هو حر

لا إجبار.. لا إقناع

لا إسفاف.. لا تكرار

لا تبسيط حد التسطيح.. ولا تعقيد أو غموض والتفاف

ولا واحد يجي يقولهم "عندك إثبات على كلامك ده؟ هو أنت متخصص؟ معاك شهادات إيه؟"

ناقص يسألهم "إنتي جاية تشتغلي إيه؟" 🤪😄😄

الرسالة أصبحت واضحة لهم أولًا وقبل أي أحد وقناة التوصيل والتواصل عندهم سالكة

ما بقوش بيقلدوا خلاص.. ما بقوش ينقلوا وهما مش فاهمين كويس 

بيطلعوا على مجالات بعيدة عنهم لكن بيلاقوا تشابه بردو ويعلموا نفسهم بنفسهم

بيتعبوا وتطلع عينهم لأجل العلم واختراق حواجزه وتنقيحه واستخراج مكنوناتهم. كل ده بيعملوه في وجود تواضع حقيقي لديهم. لا في ابتذال ولا في مخيلات ولا في أبو العُرّيف وشغل الحفظة بتوع ال٣ ورقات

التواضع في الوضع ده تحديدًا هو إنك بتكون بتؤدي عملك المعتاد وأدوارك اللي بتؤديها بحكم إنك بني آدم طبيعي عايش حياة مادية بالتوازي مع عملك الداخلي لدرجة إنك بتكتشف إن لا فرق ما بينهم في كتييير من الأحيان. وفي نفس الوقت لا تنسب الفضل لنفسك. إن الفضل إلا لله.

  ما بتقعدش تدعي ربنا يطهرك ويصفيك وتقعد تنتظر استجابة الدعوى وما تعملش حاجة

ما هذا؟! 🧐🙄

بيعلوا صوتهم؟ آه بيعلوا صوتهم أحيانًا 

على حسب جدية الرسالة..بس مش بيخطبوا في الميكروفون والجماهير أو بيتخانقوا

بيصدموا الناس؟ آه بيواجهوا وبيصدموا الناس عادي..ساعات مش هيحطوا سكر عشان تبقى حلوة..مش دايما الأسلوب ده بينجح

مفيش حد جاي يدلعك هنا أو يعاملك كطفل

طب بيعرفوا مع كل ده يكونوا هاديين وعندهم صبر؟ قطعًا! أصبح عندهم كل الأساليب اللي بيعرفوا يوظفوها امتى وفين..مش هيقوم يحدفك بحاجة في وشك مثلًا .. ولو إنها فكرة 🤭🤣

سعيدة بمعرفتكم واستلهاماتكم وإبداعاتكم وعارفة إنكم بتابعوني وأنا كمان أتابعكم أحيانًا وعارفة بعضكم بيقرأ كلماتي هنا ويمكن بيقدر يسمع صوتي في أذنه/ها كإني بقولها بنفسي. عشان كده بقولك nice to meet you even though we never met 

في المقابل، لسه في بعض المؤثرين هما نفسهم محتاجين مؤثرين أو معالجين يساعدوهم مع معاناتهم (مع أنفسهم) إللي مش عايزين يحنواعليها ويعطوها حكم بالبراءة بقا. بتكون باينة وإن أخفوا 

لسه بيقلدوا..لسه بينفخوا في كبرياءهم وبيضخموه..لسه هو اللي شغال وبيحركهم 

ما عرفوش يتواضعوا بجد .. لسه بيتقمصوا ويقلدوا وينقلوا دون فهم حقيقي ولا تجربة .. مشاكلهم الخاصة يحيلوها على بره.  "السبب فيها أي حاجة تانية غيري. أنا أصلًا فلة ومفيش مني اتنين ع الكوكب"

لسه لابسين القناع الروحاني الهائم في ملكوت آخر 24/7، أو حتى المثقف والعالِم الجليل التقي الذي لم يجود الزمان بمثله 🤨 الطيب الحكيم وأحيانا الولي الخفي

وأهي كلها ألقاب

لسه أدامهم كتيييير .. لسه!!

لسه ما اشتغلوش بجد وبذمة من جوه ونَضّفوا .. لسه في المنطقة العمياء الواسعة من أنفسهم بياكلوا ويشربوا وبانيين حياة كاملة هناك

لسه عندهم وجه 😇 ووجه آخر قبيح وغاضب يخفوه 😡🤬

حتى وجه مكسور الجناح وضعيف مجروح هو وجه ملبوس 🎭

لا يزال يحكمهم الخوف واليأس والاحتياج الشديد.  

الحب 

الفرح 

الانطلاق

القداسة 

هي عوارض تنهز وتنكسر بمجرد ظهور ما يعارضهم ويهددهم بانكشاف الأمر

لأن أغلب حياتهم لعبة الغميضة 🙈 😶‍🌫️ 

والفراغ يملؤها 🫥

حتى إني لاحظت أنهم يعانوا من الاكتئاب و/أو النرجسية منذ وقت وده السر وراء سلوكياتهم المتعالية وتفسيراتهم للأمور بشكل عجيب، ولكن لا عجب في ذلك! 

إذا كنت تقرأ كلماتي هذه هنا، أستطيع معرفة ذلك 👁 عشان كده بقولكم: اطلعوا من هنا يا أوباش. تطهروا أولًا أيها الفارغون

في النص، في فئة لسه ملغفنة شوية. لسه عايشين دور المنقذ أو الثوري الرومانسي وهو أيضًا منقذ

حتى إن في منهم بيكونوا مبالغين و"طريقك مسدود مسدود" في بعض الأحيان 🤪 أو العكس، وسهل استفزازهم

لسه عندهم ماتش مش ودي مع الجانب المظلم والعفاريت الزرق الداخلية 👹

لسه عايزين يعطوا معلومات كتير كتير وينقذوا أكبر قدر ممكن قبل الرحيل 🧳 

لسه في شوية دراما عالقة بملابسهم 😃

لا بأس! الموضوع بياخد وقت وبيكون على مراحل لغاية ما يلاقوا إجابات شافية أكتر ويتناغموا مع تردد أعلى من الحقيقة 

وفي إللي عنده ميكس. شوية من هنا وشوية من هناك

عارفة إن الموضوع يلخبط شوية اللي بيقرأ ويحيره أو يخوفه

ما تحتارش.. وما تخافش

ببساطة، حدد أنت أي جانب منهم وركز إزاي تجعله أصلي وأكثر إشراقًا ..

مش بتتقمص شئ 'حلو' عشان تطمن نفسك إنك مش وحش أوي كده. مش ناقصة تمثيل أكتر من كده 🙄

إللي هيختار جانب عشان خايف يكون الآخر، هو:

 أكتر واحد بيمثل على نفسه وعلى غيره

أكتر واحد محتاج يبص في مرايته ويشوفها ويتقبلها كما هي - إذا كانت عنده الشجاعة 

وأكتر مؤثر محتاج يقفل بقه شوية 🫢 ويرحمنا من إنتاجه الغزير ده ويوجهه لنفسه أولًا لعله يزّكىٰ

تعرف تصمت؟

طب تعرف تحب نفسك؟

لو كانت إجابتك آه، كان زمانك سكت 

ولا حياة لمن تنادي 🤷🏻‍♀️🫣🤭

Zip

٢٠٢٢/١٠/٢٢

الأعدقاء

 النرجسي  هيفضل نرجسي ولو علقوا فيه قالب عشان يعدله، هيلف ويدور بردو ويقولك امشي انت دوغري معايا 👿

مع ذلك النمط ده، برغم تفكيره وعقله الملتوي، بيجي يقدملك خدمة في رحلة وعيك 

بيقولك بص هنا 👈 👀  في نقطة ضعف عندك. سدها.  وإلا انا وغيري هندخلك منها 👻

النرجسي بيشوف الناس على إنهم أدوات وعرائس في إيده بيحركها بس لتحقيق أهدافه ومش مسموح لهم بالفكاك. وإللي هيحاول، يقابل بقا إللي هيحصله 😠

بس زي ما أنت عندك نقطة ضعف، هو/هي كمان عندهم نقط ضعف. أنت بس مش شايفها عشان هما شاطرين في تخبئتها وإنكارها

أو

لمست نقطة ضعفهم بس خايف من ضميرك يوبخك فتشفق عليهم 

الأولىٰ بيك تشفق على نفسك من العيش في الشَرَك والحلقة الجهنمية دي

اتعلم درسك كويس من وجود الملتويين فكريًا في حياتك. وقتها هتقدر تتغلب عليهم

١. القراءة والاطلاع ودراسة الكتاب الأحمر الخاص بمناوراتهم وحيلهم النفسية هيكون قوة كبيرة جدا في إيدك تقدر تتعرف بيها على أسلوب الالتفاف والمناورة أول ما يشتغل 😁

٢. تاني نقطة قوة هي إحساسك بالأمان برغم كل العك اللي بيحصل ده  💪🏻

افتقار الأمان هو أكبر ثغرات النرجسي. تخيل اما تكون نقطة ضعفه هي بالضبط نقطة قوتك، إزاي ممكن يكون الموقف؟

٣. ثالث وأهم نقطة، لا تتكبر وتنتقم من أحد أو تشمت في خساراته لمجرد إنه عمل فيك وسوّىٰ أو تنتقم من كل السيدات زي شهريار أو تنتقمي من كل الرجال عشان كرهتيهم

زي ما قلت، هو/هي عمل فيك إللي عمله عشان يلفت نظرك للثغرة اللي عندك فتقويها. زي حدودك غير واضحة المعالم مثلًا. مش تروح تستقوى على الخلق 🙄

⚠️ هو أنتو متأكدين إنكم بتتعلموا الدروس صح؟ ولا بتتعلموا الدروس الغلط من تجاربكم؟ 🫤😏

افهم يرحمك الله. قبل تجربتك المريرة مع ذاك الملتوي، أنت كنت حاجة وبعد تجربتك معاه، بقيت حاجة تانية خالص…المفترض إنها حاجة أحسن 

عشان لو مش أحسن، يبقى سعادتك ما فهمتش الدرس صح وأحسنلك تذاكر بذمة شوية 🙄

لا تستكبر على أن تطلب مساعدة متخصص خبير ليأخذ بيدك ويرافقك في رحلتك 🤝

دائما انتبه لنفسك واشتغل عليها وحياتك ستتبعها وتتحول نحو الأفضل

بشرط

ألا يكون هذا الاشتغال فكريا معلوماتيا/نظريًا فقط، بل يطال باقي أبعادك الشعورية والجسدية والروحية

وإلا..يكن التحسن طفيف ووقتي 🫥

المعرفة والاستيعاب درجات. لا تقف عند المستوى الاول منها. أكمل صعود السلم واخترق الحجاب الفاصل

وأدينا شفنا، شوية علماء بتوع ميكانيكا الكم أثبتوا نسبية آينشتاين غلط وأخذوا  نوبل السنة دي

أنا قلبي ما كانش بيرتاح للراجل ده من الأول 😄