الذكاء العاطفي
بناءً على طلبكم، هتكلم عن الذكاء العاطفي بشئ من التفصيل عشان إللي عايز يفهم أكتر وياخد تفاصيل زيادة
الذكاء العاطفي هو وعيك بنفسك ووعيك بالآخر.. الاتنين مع بعض. والشخص الواعي بنفسه بيكون واعي بأبعاده المختلفة منها بعده العاطفي واحتياجاته.. قادر يحددها وبالتالي قادر يحدد البعد العاطفي إللي يخص الأشخاص اللي بيتعامل معاهم واحتياجاتهم. وده بيسمى ب emotional attunement يعني تظبط نغماتك وموجة الراديو بتاعك على نغمات وموجة شخص آخر وتبقى سامعه وسامع البث المباشر بتاعه بمعنى إنك تعرف هو أو هي حاسين بإيه أو إيه الشعور المسيطر عليهم سواء كان شعور مريح أو لأ
ده ببساطة كده المكون الأول لذكائك العاطفي
المكون الثاني هو إنه تكون عندك خطة سليمة وفعالة في إدارة المشاعر المختلفة. والخطة دي بتبدأ بإنك أول حاجة، تحدد الشعور اللي بتحس بيه وقت ما بيحصل عن طريق توجيه تركيزك على الجسد وتحدد ماهية الشعور ومكانه فين في جسمك. ممكن حتى تحاول تتخيل شكله وتديله لون. تاني جزء في الخطة هو إنك تترك المساحة للشعور ده إنه يتواجد، ما تكبتهوش أو تقوله ارجع مطرح ما جيت. وما تقاومهوش. فقط راقبه. زي ما بتعمل مع الإيجو كده. بتراقبه بدون تفاعل معاه. نفس الطريقة مع المشاعر بس كمان هترحب بيها لأنها جزء منك يحتاج عطفك عليها وإنك تطمنها.. محتاجة مساحة للتواجد، للاعتراف بوجودها والتعبير عنها بل إنك كمان تشكرها إنها ظهرت ووصلتلك الرسالة اللي جايبهالك. إيه هي الرسالة دي؟ ده أنت بقا تقعد معاها وتشوف هي جاية تقولك أو توريلك إيه. أنا ماليش دعوة
المشاعر ميزتها في إنها بتيجي توريلك أزرارك المكشوفة واللي ممكن أي حد بقصد أو بغير يجي يدوسلك عليها ويبقى سهل استفزازك والتحكم فيك
الأزرار المكشوفة دي لها علاقة باحتياجاتك غير المشبعة أو اللي ما حصلتش عليها بشكل كافي.
اكتب ورايا. الاحتياجات النفسية بدون ترتيب كده منها: الحب الأمان القيمة الحرية القبول الإعجاب التشجيع المساندة الاحترام الاهتمام التقدير والتعزية
خطتك في إدارة مشاعرك بتأخر ردات أفعالك الأتوماتيكية اللي بتعملها في العادة زي إنك تصرخ تزعق تتسرع وتقول كلام مش محسوب يُحسب عليك مش ليك، وإن كان لك حق ممكن تضيعه بتصرفك ده أو إنك تكتم في نفسك وتبقى عرضة للأمراض.
عارفين نجاة الصغيرة لما غنت قالت إيه؟ قالت: ويشب في قلبي حريق ويضيع من قدمي الطريق. عارفين لحظة اندلاع الحريق دي..اندلاع المشاعر.. هي لحظة تقرير للمصير! لأن بناءًا على ردة فعلك، هيتحدد إيه اللي هيحصل بعد كده. هي لحظة فاصلة بين ما قبل وما بعد… لحظة اختيار.. فاختار كويس.. اختيار واعي المرة دي واااعي
قدرتك في التعامل مع المشاعر بتخليك تعرف تتعامل إزاي في المواقف المشحونة عاطفيا وإللي بتأثر عليكو وتساعد نفسك والطرف الآخر.. لأن عندك تعاطف وحسن إدارة للمشاعر وبالتالي قادر تتحول من رد فعل لاستجابة ويكون ريموت كنترولك في إيدك.. مش على حسب الموقف هواللي يحركك
فرق كبير بين إللي قادر يعمل pause يعمل وقفة ويستجيب وبين إللي مش قادر غير إنه يكون فقط ردة فعل.. نتيجة لسبب وليس سببًا.
المكون أو العنصر الثالث للذكاء العاطفي هو إنك بنفسك بتبادر ببناء العلاقات مش إنك تهرب منها. علاقات من نوعية التواد والمشاركة والتكافؤ .. علاقات صحية لها جانب إنساني عميق؛ فيها أمان واتزان واستقرار. علاقات الأطراف فيها مهتمين بالتعرف عليك على طبيعتك..على حقيقتك .. مهتمين برؤية جوانبك الداخلية العميقة اللي بتميزك عن غيرك.. مهتمين يعرفوا عن قصتك وخلفيتك وتطلعاتك وتفاصيلك. مهتمين كمان يشاركوك قصتهم وخلفيتهم وحكاويهم وتفاصيلهم
دي علاقات سوية متكافئة فيها تبادل متساوي. علاقات من نوعيات تانية لها طبيعة استغلالية أنا مش بتكلم عنها هنا ولا أنصح حد بالدخول فيها
لما بتقابل حد تتكلم معاه، بتلاقيه قادر ياخد المحادثة لجانب أعمق وطبقة أبعد من المستوى السطحي، بتلاقي في انسجام ما بينكم والوقت بيعدي بسرعة والكلام بياخدكم وأنتم مستمتعين.. كان في تدفق حاصل في الوقت ده وفي إضافة لكل حد فيكم. طبعًا مش لازم كل حد تقابله، تفتح معاه نوع من الكلام الجاد أو العميق ولكن، محتاج تكون عندك علاقات من النوعية دي في حياتك وأشخاص عندهم لمحة من الذكاء الوجداني اللي يضيفوا جانب أبعد من مجرد الكلام عن الطقس مثلًا أو البيزنس أو الردود المعلّبة الجاهزة
الأشخاص إللي مش بيتعاملوا معاك بجانبهم العاطفي، بتلاقي المحادثات معاهم قصيرة ومختصرة وباردة شوية حتى لو كانوا بيستخدموا كلمات زي: وحشتني، بحبك لكنها طالعة فقط من اللسان ومفيش أي شحنة مشاعر معاها بالتالي ما بيوصلكش منهم طاقة وما بتحسش إنهم صادقين
المكون الرابع واللي قلت عليه من شوية هو التعاطف واللي شرحته في حلقة الرد على أسئلتكم
ميزة التعاطف إنه مريح جدًا عن الجدال الطويل بدون فايدة. إيه الجدوى من إني أقعد أرد على كل كلمة بتتقال وأقول ده صح ده غلط لا أنت غلطان، أنا هفهّمك أو أنا هصححلك ولازم تسمع كلامي عشان أنا على حق دايما؟
الجدال مرهق ومش بيقرب بين الناس وبيعمق الخلاف ويزوده ومحدش هيبقى له نِفس يتكلم مع المجادل تاني أو يحتفظ بيه في دايرته لأنه معاملته صعبة
المتعاطف، على الجانب الآخر، بيسأل: أنت شايف الموضوع ده إزاي؟ إيه انطباعك عنه؟ حاسس ناحيته بإيه أو شاعر بإيه؟
اللي بيعمله المتعاطف هنا هو إنه بيعيد توصيلك بكابل المشاعر ويقولك: على مهلك شوية أنا حابب أغوص معاك جوه شوية أشوف ما وراءالأحداث وما خلف الكواليس، لو تسمح
ده اسمه engagement الانخراط وحسن الاستماع
في الأخر، إحنا بني آدمين مش آلات مجردة من الشعور والإحساس
الأذكياء عاطفيًا ميزتهم إنهم بيلقطوا التلميحات أو الرسائل المغطاة اللي مش مُعبّر عنها صراحة ويحبوا يناقشوها معاك بقلب مفتوح أو يوصلولك على طول إنهم فاهمينك
علاقاتنا ببعض وتأثيرها علينا هي جزء كبير من حياتنا وسعادتنا. علاقاتنا بناس حقيقية لها جانب عميق واتصالنا أو ترابطنا ببعض علىالجانب العميق ده بيضيف طعم للحياة وبهجة خاصة. العلاقات اللي من النوع ده بتكون مبنية على الاهتمام والحساسية تجاه أنفسنا وتجاه بعض وده اللي بيخلي الحياة تستحق إننا نعيشها
وخلوني أوجه كلمة للشخص الذكي عاطفيا، أنت شخصية حساسة تهتم بجودة علاقاتك. اللي بيجي على رادارك أو يتفاعل معاك، بتكون عنده الرغبة في إنه يطور من نفسه ويحسن جودة علاقاته وحتى بتكون له معايير عالية بعد كده لأنه فهم كيف يكون بناء العلاقات السليمة خلاص. تحية ليك وشكرا إنك موجود وإنك موجودة بصفتك الحساسة دي وما تخليش حد ينتقدك عليها ويقولك تخلص منها. دي صفة القادة ال CEOs رؤساء مجالس إدارات أكبر الشركات اللي بيختاروهم عندهم ذكاء وجداني أبعد من المهارات التقنية لمجال البيزنس لأنهم مش محتاجينها ولا هيعملوا حاجة بإيديهم خلاص. هما هيقودوا بشر.. واللي دارسين strategic management أو business coaching هيفهموا قصدي. ف دي صفة القادة من نوعية c-suite صفة الناس اللي ناجحة في حياتها بجد ونقطة قوتك. احتفظ بيها واعرف تتعامل معاها إزاي وتراعيها ولا تسمح لأحد إنه يشوه صورتك عن نفسك وخليه يتمنى لو إن عنده بعض من اللي عندك لأن إللي عندك كتير مش قليل.. لو تعلم قدره
