التعلق
موضوعي المفضل من سنين 🤩 باب لوحده كده ممكن نرغي فيه للصبح وممكن بردو نلخصه عادي. ليه هو موضوعي المفضل؟ لأنه أصيلفي تكويننا النفسي وعشان بنفضل نتعامل معاه طول العمر زي jack-in-the-box
-مالك؟
مش عارف أنسى ولا عارف أعيش
آآآه (متعلق)
-مالك؟
مستني أمنية ما اتحققتش
آآآه (متعلق)
-مالك؟
واكلينلي دماغي وطفشان منهم
آآآه (متعلق)
-مالك؟
ما بيكلمنيش 🥺
آآآه (متعلقة)
التعلق مش كله وحش. قدر منه مطلوب عشان يحصل الترابط، لكن زيادته بتعمل إدمان واعتمادية على الشئ أو الشخص المدمَن عليه. ممكن ندمن على أشخاص؟ أينعم. وممكن ندمن على السيطرة على الأشخاص
التعلق هو السبب في إننا بنشوف الدنيا والعالم بعيون والدينا أصدقائنا معلّمينا إلخ وتنتقل لنا برمجاتهم وطبائعهم ونسير على خطاهم
التعلق المرضي باختصار هو دلالة على وجود حرمان أو جوع عاطفي بيجي الشخص أو الشئ ده يشبعهولك بشكل مؤقت فتفضل فياحتياج له دائم ويتدرج إلى أن تصل لمرحلة الإدمان ويبقى الاستغناء عنه تحدي كبير.
علاماته إيه؟ أشهر علامة له هي الملل. لما تلاقي نفسك زهقان وتقول أنا زهقان وتكررها 😑 وما عندكش حاجة تعملها غير الاهتمام بالشئ أوالشخص ده فيشفط حياتك كده شفط. علامة تانية هي الجسد وإلحاحه في طلب اللذة اللي بيحصل عليها من الشئ أو الشخص محورالتعلق. كيمياء الجسد بتتغير عشان تفضل في احتياج إليه
في علامة ثالثة 🪧 وهي القاموس اللغوي اللي بيستخدمه المتعلق وهو/هي مش عارفة
أمثلة المتعلق: بعض الناس هواة المغامرات والإثارة بشكل زائد
هواة أفلام الرعب والقتل والدماء - وبردو هواة ألعاب الڤيديو
مدمني الإنترنت (٥ ساعات وأنت طالع يوميًا)
التسوق، الأكل، العمل، العلاقات
كلها ملذات معاها ربط عاطفي + خوف
المتعلقين بقا أنواع أشهرهم الهارب والمطارد. الهارب هو الشخص اللي بيهرب من المواجهة ويتجنبها والمطارد هو الشخص اللي بيجري وراالناس يطلب حبهم واهتمامهم في مقابل اهتمامه هو بهم. كل نمط بيأثر على صاحبه في علاقاته، طريقة تواصله مع الآخرين وطريقة إدارتهللخلافات/الصراعات لكن الاتنين لهم خلفية في الطفولة خلت كل واحد متعلق بس بشكل/ديناميكية مختلفة. وممكن كمان الاتنين يتبادلوا الأدوار دي
التعلق ضارب بجذوره في حياتنا. فاكرين لما كلمتكم على جري الوحوش في مقال التوازن ؟ اربطوا المقالين ببعض
عايز توازن، فك روابطك. عايز أمنية تتحقق، فك روابطك. عايز تبقى متعلق آمن (مستقل حقيقي مش مهدد بالرفض أو الترك)، فك روابطك. عايز تحس بالأمان في علاقاتك وفي الدنيا عمومًا، فك روابطك. عايز تتغلب على نفسك اللي تعباك، فك روابطها
وطييير 🙂 مفيش حرية في التعلق ولا الخوف ولا القلق ولا الشك في الناس ونواياهم. في ناس سجنهم عقلي مش مكاني بالتالي إذا فتحتلها القفص هتفضل مكانها مش بس عشان محبوسة..عشان شجاعتها هربت
فك الروابط هو شكل من مسامحة الماضي
تفتكر ممكن يحصل إيه إذا فكيت وطرت وعليت؟
لو قلتلك هاخد منك خوفك وأديلك أمان بداله، الحياة هتختلف إزاي معاك؟
#مسلسل_هربانة_منها_ومنه
#نفسويتنا_المعقدة_الجميلة😁
ليست هناك تعليقات:
إرسال تعليق