الحب
كل المشاكل اللي سردتها واتكلمت عنها الأيام اللي فاتت دي حلها الحب
لو كنت واحد بتحب نفسك مش هتلعب دور الضحية ولا الجاني
لو كنت بتحب حقيقي هتعرف تسامح وهتحترم تجارب الآخرين واختياراتهم
لو كنت بتحب ربنا هتحب خلقه ومش هتعايرهم أو تنقم عليهم وتنتقم
قلت قبل كده إن التعامل مع البشر ممكن يكون مقزز بعض الشيء لكنه معلم..علمني الحب الحقيقي بيكون إزاي وإحساسه إيه والتصرف بمقتضاه امتى وفين
الحب موجود في كل العلاقات مش بس الرومانسية..بس أساسه إنك تحب وتعرف نفسك عشان تعرف تختار وتعيش وتحقق وتعبر بحرية وتلهم
خلي بالك من حاجة. في نوع من حب الذات خبيث وسرطاني حبتين. أينعم هيحققلك حاجات كتير حاجات تطمّع بس هتفضل عايش وانت عارف إنك فاضي من جواك..ميت.. لازم تلف الزنبرك عشان تكون فيه شوية حركة وتبان عليك معالم الحياة فمحدش يشك في موتك
اللي بوصفه ده حقيقي وموجود..مخيف لكن موجود
ماتركزش عليه. خليك بس عارفه ومعترف بوجوده وركز على الحب الحقيقي وإنك تعلي قيمته وإحساسك بيه وبالحاجات اللي بتيجي معاه. مارسه وخليه تدريب بالنسبالك تحس فيه إنك عايش وتحس بدقات قلبك. سيبه يحسن حالتك الصحية. سيبه يحسن علاقتك بذاتك وعلاقاتك بالبشر من حواليك. سيبه يبدع. بس غذيه زي النبتة عشان يكبر جواك. اتكلم عنه ما تخجلش منه. قويه واختاره على كبريائك. اعرف مين وايه أعداءه واتغلب عليهم. اختاره في كل الأحوال
يا جماعة الحب مش ضعيف حتى وإن بدا كذلك. بالعكس ممكن يكون غير متنبأ به وقتها لازم تعمله ألف حساب..الحب ماكر بس مكر عن مكر يفرق 😉
الحب ضروري لصحتك العقلية والنفسية بالظبط زي علاقتك بربنا كده. مستغني عنها؟
#قوم_فِز_حب_روحك
ليست هناك تعليقات:
إرسال تعليق